مش باقي مني
غير شوية ضي في عينيا
أنا هديهوملك ....
وامشي بصبري في الملكوت
يمكن في نورهم تلمحي خطوة
تفرق معاكي بين الحياة والموت
مش باقي مني
غير شوية نبض في عروقي
خدي .... وعيشي
وافتحيلي تابوت
أفرح بريحة ورد فرعوني
وربنا في عوني
إذا دخلت الجنة ولا النار
هشتاق إلى ضحكتك
وقعدتي في الدار
والقهوة متحوجة بطيبة العطار
في كل يوم الصبح
أشرب حليب قبطي
وفي النهار والمسا
أمسك ستار الكعبة لو سبتي
وأثبت إذا هربتي
أهديكي عمري ... وحسي ... وجوارحي
أهديكي جرحي
هو اللي باقي في دنيتي
لما خلص فرحي
مش باقي مني
غير شوية لحم في أكتافي
بلاش يتبعتروا في البحر !!
بلاش يتحرقوا في قطر الصعيد في العيد !!
بلاش لكلب الصيد تناوليهم
خدي اللي باقي من الأمل فيهم
وابنيلي من عضمهم
في كل حارة مقام
وزوريني مرة وحيدة
لو كل ألفين عام
ألم الجراح يتلم
مش باقي مني
غير شوية دم
متلوثين بالهم
مرٍّين وفيهم سم
كانوا زمان .... شربات
والنكتة سُكَرهم
شربتهم الخفافيش
في قلب أوكارهم
مش باقي مني
غير شوية دم
ماقدرش
أسقيكي مواجيعهم
وبرضه ماقدرش
أرميكي وأبيعهم
يمكن في مرة
تعوزي تطلبيني شهيد
هحتاج يوميها الدم
يمضي على شهادتي
مش باقي مني
غير شوية قوة
في إرادتي
على شوية شعر
من خطي
حاسبي عليهم
وانتي بتخطي
وانتي في صبح الدلال
بتعطري شطي
مش باقي مني
غير شوية ضي في عينيا
أنا مش عايزهم
لو كنت يوم هلمحك
وانت بتوَطّي
في معركة مافيهاش
ولاطايرات ولا جيش
وانتي في طابور العيش
بتبوسي ايد الزمن
ينَوِلك لقمة
من حقك المشروع
مش باقي مني
غير شهقة
في نفس مقطوع
بافتحلها سِكّة
مابين رئة وضلوع
مابين غبار ودموع
وانا تحت حجر المقطم
في الدويقة بَاموت
أنا والعطش والجوع
يئن تحت التراب
وانا صوتي مش مسموع
يا حلمنا الموجوع
من المرور ممنوع
مستني لما يمر
موكب سلاطينك
مش باقي مني
غير شوية رحمة من طينِك
على شوية صبر من دينِك
مش باقي مني
غير حبة غُنا تايهين
في الضلمة مش لاقيين
حس الفواعلية
ولاصوت مراكبي عَفِي
فوق المعدية
ولاصوت بناتي العذارى
في كل صبحية
والغنوة أمنية
ياما نفسي أقابل حبيبي
وانا عالزراعية
صوتِك وصوتهم غاب
وانا تحت حجر المقطم
بموت لوحديا
الليلة راحت عيوني تطل عالبستان
وجناين الرُمّان
رجعتلي توصف عناد الغل والدخان
وسحابة سودا تضلل على الغنا الغلبان
رجعتلي توصف هبوب الموت على الألوان
رجعتلي توصف خيال الذل
في موائد الرحمن
مش باقي مني
غير شوية كُفر بشروقك
وانا ..... منبع الإيمان
مش باقي مني
غير شوية ضي
وعينيا مش قادرة تلمحني
في وحدتي محني
خايف أموت مالخوف
والضعف يفضحني
السجن عشش في قلبي
وماشي في شوارعِك
نفس اللي باعني وخدعني
بالرخيص .... بايعِك
هشيل حمولي أنا
ولا هشيل حِملك
ماعدت أملك شيء
فيكي ولا فيا
ولا قيراط ولابيت
ولا نسمة صافية
تلاغي النيل بحرية
مش باقي مني
غير شوية حب جارحينّي
ولا باقي مني
غير شوية ضي في عينيا
2010-05-30, 1:46 am من طرف 
