AhMeD GhARiB
مشرف
عدد الرسائل : 1318
العمر : 34
نقاط : 6015
السٌّمعَة : 5
تاريخ التسجيل : 27/07/2008
 | | لعشاق أدهم صبري(حوار ساخر مع أدهم صبري !!..د/شريف عرفة) | |
حوار ساخر مع أدهم صبري !!..د/شريف عرفة
حوار ساخر مع أدهم صبري
طبعا كلنا عارفين أدهم صبري بطل سلسلة روايات (رجل المستحيل ) أكثر الكتب مبيعا بين الشباب..رجل المستحيل , ضابط المخابرات المصري إللي عمل ما يزيد عن 150 مغامرة دوّخ فيها اجهزة مخابرات العالم و يطلع كل مرة زي الشعرة من العجين.. ضابط المخابرات المصري إللي خلى جيمس بوند راحت عليه خلاص .. رجل المستحيل إللي بيجيد جميع اللغات الحية و الميتة و يجيد جميع رياضات الدفاع عن النفس و استخدام جميع أنواع الأسلحة و يجيد قيادة جميع أنواع المركبات.. كلناعارفينه طبعا...و بنتابع رواياته بكل فخر و انتماء..
و عشان قراءنا الأعزاء قوي قررنا نعمل معاه حوار , من موقع الحدث أثناء أحد مغامراته...أي خدمة يا شباب !
المكان : أحد ابقاع النائية في العالم..
الموقف : سبعة جيوش من دول مختلفة تطارد أدهم صبري.. النيران و القذائف تحيطه من كل جانب , و القناصة و المدرعات و الطائرات تطارده و مهمتهم الوحيدة هي القضاء عليه لأنه عامل لهم وجع دماغ زيادة عن اللزوم !!
أدهم صبري يحتمي بجدار شبه متهدم و يعيد حشو ( الآر بي جي ) الخاص به .. في هذه اللحظه جاءت فرصتي لإجراء حوار انفرادي معه...
[b]- بنرحب بيك في ( موقع روايتي ) يا أستاذ أدهم ..
- أهلا بيك !
- قصصك في معرض الكتاب بتحقق مبيعات هايله بين الشباب.. تفتكر ليه ؟
- يمكن عشان بيحبوا يعيشوا العالم ده .. لكن أنا نفسي مش عارف ليه بصراحة !
- لما بتروح معرض الكتاب بتشتري ايه ؟
- اي حاجه غير القصص بتاعتي !
- إنت مصري صميم و بتكلمني دلوقتي بالعامية.. أمال ليه بتتكلم باللغة العربية الفصحي في قصصك ؟
- أنا باتكلم بالعامية طبعا لكن باتكلم بالفصحى عشان شغل قصص بقى .. مانت فاهم !
- ما هي هواياتك ؟
- إني اطارد عملاء الموساد و أبوظ عملياتهم... و اعكنن على أجهزة المخابرات المعادية.. و المهم طبعا إني أبسط القراء..عن إذنك !
و انحنى ليتفادى طلقة مدفع و انهال بوابل من الرصاص لينسف دبابة و يعود لحشو الكلاشينكوف الخاص به..
- ماذا تفعل في وقت فراغك؟
- ماظنش إن كان عندي وقت فراغ أساسا.. إنت مش شايف ؟؟
- ماهي أكلتك المفضلة ؟ المنسف ؟
- لأ.. باحب الفول و الطعمية !
-طيب..من هو مطربك المفضل ؟
- عاجباني جدا أغنية ( ماتفولش إيه و ازاي و ليه؟) بتاعة فيلم مافيا, إللي غناها مدحت صالح .. لأنها بنتطبق على كل حاجه بتحصل عندنا.. مش هاتفهم حاجة !
- يقال انك ماتجوزتش لحد دلوقتي عشان لسه بتجهز نفسك زي الشباب المصري .. ماذا تقول ؟
- لأ الموضوع مش كده خالص.. كل الموضوع إني لسه باسد الخروم بتاعة الرصاص إللي في جسمي !!
[center]- بيجيلك ايميلات من المعجبات ؟ و بترد عليها ازاي ؟
- عندي ايميل فعلا.. و بيجيلي ايميلات كتير من المعجبات ..لكن باحاول أفوقهم و اقول لهم إني مش شخصية حقيقية و إني شخصية روائية و أقنعهم أنهم صعب يلاقوا حد بالشكل ده..كانت (مني) أشطر !
- لما تعمل فرحك على ( منى ) هاتعزم مين ؟
- هاعزم قدري خبير التزييف صاحبي.. لكن المهم أعزم سونيا جراهام- إللي بتحبني- عشان أغيظها !
- بتروح فين في الاجازة ؟
- أنهي أجازة ؟!!
- من الملاحظ إن إنت دايما لابس بدلة زرقاء مع كرافته حمراء.. ليه ؟ و مافكرتش تلبس كاجوال ؟
- بالبس كاجوال طبعا.. لكن الرسام مش بيرسمني بيها !
- بتخرج فين مع شلتك ؟؟
- ماليش شلة.. هم منى و قدري ماليش صحاب غيرهم .. باروح معاهم مغامرة مثلا.. نطارد حد.. نهرب من مطاردة حد.. هي دي التسلية بتاعتنا !
- ايه نوع الموبايل بتاعك ؟
- مش باستخدم موبايل لكن باستخدم أجهزة أكثر تطورا.. لو
استخدمت موبايل مش هاعرف أشتغل من كتر ( الميسد كولز ) اللي هاتجيلي.. تخيل كده واحد الموساد تديله (ميسد كول) ؟ ماينفعش طبعا !
- إيه علاقتك بمؤلفك د. نبيل فاروق ؟
- أعرفه من بعيد , لكن باقرا إسمه على القصص بتاعتي.. بيحصل بيننا مشاكل كتير طبعا لأنه كل شوية يموّتني و يدوخني .. ممرمطني معاه و الله الراجل ده !
-جبت كام في الثانوية العامة ؟
- بيني و بينك ماجبتش مجموع طب و لا هندسة بصراحة.. !
- فيه واد صاحبي مضايقني عايزك تروقهولي.. ايه نظامك في العملية دي ؟
-لا روح لسونيا هي بتاعة الكلام ده .. أنا راجل محترم ماليش في الحاجات دي !
- بتقرا مقالاتي في موقع روايتي ؟؟
- طبعا باقراها .. أمال باعمل إيه بين كل مغامرة و التانية ؟!!
- نصيحتك إيه للشباب اللي عايز يبقى ضابط مخابرات جامد زيك ؟
- أكتر حاجه بتضحكني لما بيجيلي شاب صغير يقوللي : عايز أكون ضابط مخابرات ! دي عملية صعبه جد أهم حاجه انك تركز تكون انسان ناجح !
- تعرف رأفت الهجان و جمعة الشوان ( كزملاء مهنة ) و بتقعدوا عالقهوة مع بعض و كده ؟
- دول مش زملاء مهنة دول تلاميذ مهنة.. لأنهم عملاء بس مش ضباط مخابرات محترفين.. عملوا خدمات جليلة للوطن طبعا لكن مش زملاء مهنة..مش ضباط مخابرات !
- هل هاتستمر و لا لأ ؟
- فيه عقبات بتواجهني حاليا لكن مش عارف هاستمر و لا لأ.. أنا ناوي لكن مش عارف الحياة ناوية و لا لأ !
- هل لديك أقوال أخرى ؟
- أقر بكل ما جاء في هذا التحقيق !
- شكرا يا أستاذ أدهم..
ابتسم ابتسامة واثقة و أجاب :
- العفو..
و استدار على عقبيه في مرونة فائقة ليلكم أحد المقاتلين في وجهه.. و اعتدل ليواجه الجيوش وحده في بسالة , لأنه الرجل..رجل المستحيل
م
ن
ق
و
ل
م
ن
ر
و
ا
ي
ا
ت
ي [/b] [/center] | |
|
2010-05-30, 1:46 am من طرف 
